Libiya,(insidesomalia.org)-Dooni ay saarnaayeen muhaajiriin Soomaali ah ayaa waxaa ay ka shiraacatay Xeebaha Dalka Libya 20 kii bishan aanu kujirno,taasi oo ku sii jeeday Dalka Talyaaniga.

Tahriibayaashani oo intooda badani ka cararay dagaalada ka taagan dalka Soomaaliya gaar ahaan Magaalada Muqdisho ayaa waxaa ay naftooda ugu biimeeyeen saxaraha isku xira wadamada Sudan iyo Libya iyo weliba Badweynta u dhexeeysa Wadamada Libiya iyo Talyaaniga, halkaasi oo ay ka raadinayaan nolol dhaanta tan ay uga carareen dalkoodii hooyo.

Dadkani Soomaalida ah ee ay doonida kula degtay Bada u dhexeeysa wadamada Libya iyo Italy ayaa waxaa tiro ahaan lagu qiyaasay in ay gaarayeen 35 qofood oo isugu jiray haween iyo rag oo dhamaantooda u badnaa dhalinyaro.

Weli wax war ah kama soo bixin Dowlada KMG ah ee  Soomaaliya oo ku aadan dhibaatooyinka ay dhalinyarda kala kulmaan biyaha wadamada Libiya iyo Teliyaaniga iyo weliba Xeebaha u dhexeeya Soomaaliya iyo Yemen, maadaama ay masuuliyada Shacabka Soomaaliyeed ay saaran tahay Dowladda.

Ma’ahan markii ugu horeeysay  ee Muhaajiriin Soomaali ah ay ku nafwaayaan badaha u dhexeeya libiya iyo Talyaaniga waxaana bishan oo kaliya lagu weysan yahay dada gaaraya 150 ruux oo Soomaali  ah, kadib markii ay la quustay doonidii ay saarnaayeen dadkaasi.