|
 Jowhar,(insidesomalia.org)- Wararka Naga soo gaaraya Tuulada Xaaji Cali oo ka tirsan Gobolka Shabelaha Dhexe ayaa sheegaya in halkasi kooxo hubeysan ku rasaaseeyeen Gaari Rakaab ah oo ku sii jeeday Magaalada Muqdisho.
Kooxahaani Hubeysan ayaa la xaqiijiyay in ay isbaaro u taalay Tuuladaasi, isla markaana rasaas aan loo meel dayin la beegsadeen gaari oo ay saarnaayeen dad rakaab ah kana yimid deegaanka Biya cadde oo Gobolka Shabeelaha Dhexe ka tirsan.
Arintaan ayaa loo aaneynayaa in ay la xiriirto aano qabiil, kadib markii kooxahaani qabiilka ay ka soo jeedaan dhawaan laga dilay nin caan ahaa kana shaqeyn jiray Hay'ad samafal oo deegankasi ka howlgasha.
Dadkii ku geeriyooday dhacdadaasi iyo kuwii ku dhaawacmay ayaa la keenay isla xalay Degmada Jowhar ee Xarunta Gobolka Shabeelaha Dhexe oo saaka lagu aasay Meydkii halka dhaawaciina lagu dabiibayo Isbitaalka Degmadaasi kuyaala.
Odayaal dhaqameedyo ka soo jeeda labada beel ee diriirtu ka dhaxeyso ayaa lagu soo waramayaa in ay haatan ku howlan yihiin qaabkii loo qaboojin lahaa xiisadaasi oo laga baqdin qabo in ay faraha ka sii baxdo.
Maamulka ka arimiya Gobolka Shabeelaha Dhexe ayaa iminka u muuqda mid aan faragalin muuqata ku soo sameyn karin arintaani Maadaama Maamulku uu haysto culeys xoogan oo ka soo wajahaya dhinaca kooxaha Dowladda ka soo horjeeda.
Inta badan Is ugaarsiga dhinaca qabiilka ku saleysan ayaa caadi ka noqotay gudaha Dalka Soomaaliya tan iyo bur burkii Dowladdii dhexe 1991 waxaana inta badan markii ay falalkaani dhacaan isku howla Odayaasha Qabiilaadka ka soo kala jeeda si ay u soo afjaraan khilaafaadka jira.
 |
Subscribe to this comment's feed