Diinsoor,(insidesomalia.org)- Kooxo hubysan ayaa toogasho ku dilay sarkaal ka tirsan hay'adda WFP iyo darawalkiisii xilli uu booqasho ku joogay dalka Diinsoor, halkaasoo ay dagan yihiin xaaskiisa iyo caruutiisa.

Sarkaalka la dilay oo lagu magacaabi jiray Cabdi Qaadir Diyad Maxamed ayaa waxaa dilay kooxo hubeysan, iyagoo la toogtay darawalkii gaariga u waday oo ay Hay'adda WFP sheegtay inuusan ka mid ahayn shaqaalahooda.

"Dilkaas wuxuu ahaa mid arxandaro ah, waxaana lagu dilay sarkaal sare oo ka tirsan Hay'adeena" ayuu yiri Madaxa guud ee WPF Josette Sheeran, isagoo intaas ku daray inay tacsi u dirayaan ehelada iyo cid walba oo garanaysa sarkaalka.

Maxuumka ayaa ahaa Madaxa dhaqaalaha iyo Maamulka ee WFP Soomaaliya, wuxuuna shaqada u bilaabay laba bilood ka hor, isagoo xafiis weyn ku lahaa Degmada Waajid ee Gobolka Bay.

Ruux kale oo la socday Cabdi Qaadir iyo darawalkiisa ayay hay'adda WFP sheegtay inuu cagihiisa kaga baxsaday, iyagoo damacsanaa inay dilaan, waxayna hay'addu ku tilmaantay falalkaan kuwo laga naxo.

WFP ayaa qorsheynaysa in ay cuno gaarsiiso Soomaaliya gaaraysa 2.4 Milyan, kuwaasoo dhibaatooyin cunno ay ku hayso guud ahaan Soomaaliya, gaar ahaan goobaha loo barokacay.