Muqdisho, (insidesomalia.org)- Golaha dhaqanka iyo Midnimada Beelaha Hawiye ayaa ugu baaqaay kooxaha afduubka u geeysta shaqaalaha Hay’adaha Samafalka in ay joojiyaan, isla markaana waxaa ay ugu baaqeen in ay sii daayaan kuwa ay haatan heystaan.

Afhayeenka Golaha dhaqanka iyo Midnimada Beelaha Hawiye Axmed Diiriye Cali oo xalay u waramayay Idaacadaha Muqdisho ayaa sheegay in aysan munaasib aheeyn in la qafaasho shaqaale u shaqenaya Hay’ada gargaar hadii ay Ajaanib yihiin iyo hadii ay Soomaali yihiin intaba.

Axmed Diiriye ayaa tilmaamay in ay keeneeyso arintaasi in ay sii balaarato dhibaatada heysta dadka shacabka ah gaar ahaan kuwa barakacayaasha ah hadii la sii wado qafaalashada shaqaalaha Hay'adaha Samafalka ku hawlan.

Shalay ayeey aheeyd markii Gudoomiyaha Isbeheeysiga dib u xoreeynta Soomaaliya Shekh Shariif Sheekh Axmed oo ku sugaan Dalka Kenya uu si weyn u dhaleeceeyay Afduubka loo geysanayo shaqalaha Hay’adaha Samafalka ee ka shaqenaya u gargaarida dalka hadii ay yihiin Ajaaniib iyo Soomaali intaba.

Habeen hore ayeey aheeyd markii kooxo dableey ah ay afduubteen Madaxa Hay’ada Qaramada Midoobey u qaabilsan Qoxootiga ee UNHCR xafiiskeeda Muqdisho Xasan Max’ed Cali xili uu ku sugnaa guri uu ka degenaa deegaanka Ceelasha Biyaha.

Ku dhawaad toboneeyo u shaqenayay Hay’ado Samafal oo isugu jira Soomaali iyo ajaanib ayaa lagu afduubtay gudaha Dalka Soomaaliya, kuwaasi oo aan laga war heyn halka ay ku danbeeyeen.