Muqdisho. (insidesomalia.org)-Illaa 5 qofood oo isugu jira Caruur iyo Dad da’ah ayaa gaajo iyo macluul ugu geriyooday inta u dhexeeysa deegaanka Xaawo Cabdi iyo Degmada Afgooye ee Gobolka Banaadir.

5 ruux oo 3 ka mid ah ay yihiin Caruur ayaa ugu geeriyooday gaajo Kaam lagu magacaabo Sarmaan oo ay ku sugan yihiin dad Qaxooti ah oo ku yaala inta u dhexeeysa Deegaanka Xaawo Cabdi iyo Lafoole.

Axmed Max’ed Waraay oo ka mid ahaa dadka ku nool Kaamkasi oo Saxaafada u waramayay ayaa sheegay in dadkaasi ay u nafwaayeen nafaqo la’an iyo gaajo iyo weliba qaboow ay u gagsan waayeen oo ku haleelay meel banaan ah, kadib markii uu roobabka qaaday aqaladii ay dadkasi ku hoyan jireen.

Dadkani ku nool Xeerooyinka dadka Qaxootiga ah ee ku yaala inta u dhexeeysa Muqdisho iyo Afgooye ayaa waxaa ay u badan yihiin dadkii Magaalada Muqdisho ay ka barakiciyeen dagaalada iyo weliba dadkii markii horeba qaxootiga ku ahaa Muqdisho.

Dadkani ayaa waxaa ay sheegeen in kudhawaad 3 Bilood aysan helin wax gargaar ah, isla markaana maalinba maalinta ka danbeysa ay xaaladooda ka sii dareeyso hadii aan wax laga qabana ay macluusha sii kordhi karto.

Dhamaan Hay’adaha Samafalka iyo shacabka Soomaaliya ayeey ugu baaqeen in ay wax ka qabtaan dhibaatada ku sii baaheeysa dadkaasi.

Dhawaan ayeey aheeyd markii dad u badnaa Caruur ay ku geeriyoodeen inta u dhexeeysa Muqdisho iyo Degmada Afgooye, kadib markii roobab mahiigaan ah ay ku dul de’een dadkaasi Qaxootiga ah oo aan haysan guryo ay roobka xiligan da,aya ay kagalaan.