Hargeysa,(insidesomalia.org)- Dooxa Magaalada Hargeysa ayaa xalay  10:30 qaaday Gaari Bas ah iyo rakaabkii saarnaa oo tiradooda lagu qiyaasay 30 qof, Waxaana socda hawlgal lagu samata bixinayo dadkii saarnaa Baska ee uu qaaday daadka.

Gaariga Baska ah oo ka mid ah basaska u baxa xaafada pepsiga iyo Isha Boorama ayaa ka tallaabayey dooxa kala qaybiya Magaalada, halkaas oo uu si lama filaan ah ugula kulmay daad xawli ku soconaya oo ka yimi roob galabta makhribkii ka da’ay deegaamada Galbeedka iyo Koonfurta Hargeysa.

Gaadhiga ayaa la sheegay in daadku qalibay, isla markaana la maqlay qaylada qaar ka mid ah dadkii rakaabka ahaa oo daadku qaaday.

Waxaana gurmad u fidiyey dadka deeganka iyo Ciidanka Booliska oo ka yimi taliska Guud ee Booliska oo ku yaala dooxa dhinaciisa Koonfureed, kuna beegan wadada dooxa dhexmarta ee ay baabuurtu ka talawdo intii ka dambeysey markii uu daad baabiyey qaadayna Biriijkii laga talaabi jiray.

Shan iyo labaatan qof ayaa la badbaadiyey oo ay ku jiraan darawalkii baska iyo wiilkii Kirishbayga ahaa.

Waxaana la sheegay in sadex qof daadku qaatay halka laba kalena uu ku jiifsaday basku markii uu daadku qaaday sadexda ruux ee daadku qaaday ayaa la raadinaya raq iyo ruux ilaa haddana waxa la xaqiijiyey geerida shanta ruux.