Muqdisho, (insidesomalia.org)-Dedaalo lagu doonayo in dib loogu daycatiro wadooyinka ku bur buray roobabka iyo dayactir la’aanta ayaa waxaa ay ka soconayaan Magaalada Muqdisho.

Kadib is afgarad dhex maray gudiga gaadiidleeyda iyo gudiga gancsatada Gobolka Banaadir ayaa waxaa ay maanta bilaabeen in ay uruuriyaan lacago ay ka qaadayaan gaadiidka ka dhex shaqeeya inta u dhexeeysa isgooyska Hawl wadaag iyo kan KM4 ee Magaalada Muqdisho.

Lacagaha maanta laga qaadayay gaadiidleeyda ayaa gaareeysay lacago gaaraya 10.000 toban kun oo shilin Soomaaliya taasi oo lagu doonayo in dib loogu dayactiro wadooyinka ku bur buray roobabkii dhawaanahan ka da’ayay Magaalada Muqdisho gaar ahaan Isgooyska Bakaaraha oo si weyn ugu bur buray roobabka, kaasi oo intisa badan ka sameeysmay boholo waaweeyn oo aysan marki karin Gaadiidka.

Darawalada Gaadiidka Bl-ka ayaa si weyn u soo dhaweyay tilaabadasi waxaana ay sheegeen in ay ku faraxsan yihiin isla markaan ay qeyb weyn ka qaadanayaan dayactirka lagu sameeynayo wadadaasi.

Mid ka mid ah gudiga gaadiidleeyda oo Saxaafada u waramayay ayaa sheegay in markii ay waayen cid iska xil saartay wax ka qabashada wadadasi aay igu go’aansadeen in ay wax ka qabtaan burburka sii balaaranaya ee ku yimid isgooyska Bakaaraha.

Dhanka kale Ciidamada AMISOM ee Dalka Soomaaliya u jooga howlaha Nabad ilaalinta ayaa maanta iyana dhankooda ka bilaabay dayacti ay ku sameeynayaan wadada hor marta Jaamacaddii hore ee Ummada, taasi oo ku dhawaad 20 sano aan heli wax dayactir ah.

Ciidamadani oo fariisin ay u tahay Jaamacaddii hore ee Ummada ayaa barqanimadii maanta soo buux dhaafiyay hareeraha Wadadasi iyagoona in mudo ah xanibay isku socodka gaadiidka iyo dadka xiliga ay dayactirka ka wadeen wadadaasi.

Ciidamada ayaa waxaa ay wadada dhexdeeda gaar ahaan goobaha ay ka bur bursan tahay ay ku shubayeen dhagxaan aad u fara badan si ay ugu dayac tiraan bur burka ku yimid inta badan wadadasi.

Darawalada gaadiidka ka shaqeeya inta u dhexeeysa degmada Afgooye iyo Magaalada Muqdisho ayaa si weyn u soo dhaweeyay talaabada ay Ciidamada AMISOM ku dayactirayaan laamigaasi.

Arimahani oo dhan ayaa waxaa ay ku soo beegmayaan xili wadooyin fara badan oo ku yaala magaalada Muqdisho ay go’een kadib markii roobab Mahiigaan ah oo ka da’yay magaalada ay wax yeelo u geeysteen wadooyinka halboowlaha u ahaa isku socoda dadka iyo gaadiidka ee magaalada Muqdisho.