Muqdisho,(insidesomalia.org)- Waxaa maanta shir jaraa’id ku qabtay Magaalada Muqdisho Milkiilayaasha qaar ka mid ah Hoteelada waaweyn ee Magaalada, iyagoo ka cabanaya inaan weli la siin lacag gaareysa illaa $3 Milyan oo Dollar oo ah kirada iyo cunadii boqolaal ka tirsanaa Ergooyinkii ka yimid Gobolada Dalka ee ka qeyb galay Shirkii dib u heshiisiinta ee lagu soo gebagebeeyay Sanadkii hore xarunta Gaadiidka Booliska oo ku taala Degmada Cabdicasiis ee Magaalada Muqdisho.

Axmed Cali Culusow oo ah Guddoomiyaha Guddi ay sameysteen Hoteelada ay ka mid yihiin Naasa hablood, Madiina, Ambasador, Lafweyn iyo kuwo kale, ayaa sheegay in aysan jirin wax lacago ah oo laga siiyey Ergooyinkii ka qeyb galay Shirkii dib u heshiisiinta haba yaraatee, waxayna sheegeen in ay lacagaasi ku leeyihiin Madaxweynaha Dowladda Federaalka Soomaaliya Cabdullaahi Yuusuf Axmed iyo Gudoomiyaha Shirkii dib u heshiisiinta Cali Mahdi Maxamed.

Waxay sheegeen guddigaasi in sidii ay lacagahooada ku heli lahaayeen ay u fuuleen geed dheer iyo geed gaaban, hase ahaatee ay waayeen cid ay kal hadlaan Lacagtoodii maqan, waxayna xuseen in lacagahooda ay aaminsan yihin in la bixiyey, hase ahaatee la lunsaday oo arintaan ay ka danbeeyaan shaqsiyaad aanay magacaabin oo ka tirsan guddiga dib u heshiisiinta Qaranka oo ay sheegeen in ay markii hore u sheegeen in lacagahooda loo hayo lana siin doono, hase ahaatee markii dambe isbedelay waa sida ay hadalka udhigeene.