Marka,(insidesomalia.org)- Dhaqdhaqaaq xoogan oo luugu diyaargaroobayo Ciidul Fidriga ayaa si weyn looga dareemayaa suuqyada kala duwan ee Magaalada Marka ee xarunta Gobolka Shabelaha hoose.

Waxaa si xoogan looga dareemayaa suuqyada kala duwan ee Magaalada Marka dhaqdhaqaaq ganacsi oo dadka ku nool magalada Marka iyo hareeraheeda ay ugu diyaargarobayaan munaasibada ciidul fidriga oo fooda nagu soo heysa.

Goobaha sida weyn looga dareemayo ganacsiga ayaa waxaa ka mid ah goobaha lagu iibiyo dharka iyo kabaha iyo weliba qalabka Caruurta ay ku ciyaaraan halkaasi oo lagu arkayo hooyooyin caruutooda gacmaha ku wata isla markaana doonaya in ay caruutooda wax u gadaan.

Sidoo kale u diyaar garoowga ciidul fidriga ayaa waxaa laga dareemayaa goobaha lagu iibiyo macmacaanada iyo halka ay dumarka isku qurxiyaan taasi oo u muuqata marka aad tagto goob aad u mashquul badan.

Ciidani ayaa waxaa ay ku soo aaday xili sicir barar xoogan uu ka jiro guud ahaan dalka Taasi oo qosaska intooda badani ku qasabtay in ay ubadkooda u gadan waayaan dharka iyo kobaha ay ku ciidi lahaayeen.

Arimahani ayaa waxaa ay ku soo beegmayaan xili gobolka Shabelaha hoose gaar ahaan Magaalada Marka ay ku sugan yihiin dad farabadan oo ka barakacay dagaalada ka taagan Magaalada Muqdisho kuwaasi oo ka qeyb qaadanaya u diyaar garoowga munaasibada Ciida waxaa sidoo kale halkaasi ku sugan qoysas aan awoodin in ay u dabaal degaan munaasibadani isla markana uu waqtiga u saamix la’yahay in ay caruutooda u iibiyaan dharka ay ku ciidi lahaayeen.