Muqdisho,(insidesomalia.org)- Banaanbax rabshado wata oo looga soo hor jeeda Diidista Lacagaha Shilin Soomaaliga ayaa maalintii labaad ka soconaya qeeybo ka mid ah Magaalada Muqdisho.

Dadweeyne careeysan oo gaaray kumaan kun oo ruux ayaa maanta waxaa ay isugu soo bexeen qeeybaha kala duwan ee Magaalada Muqdisho gaar ahaan Degmada Dharkeenleey waxaana ay ku qeeylinayeen Ereyo ka dhan ah kala Sooca lagu hayo Shilin Somaliga iyo sare u kaca ku yimid Maciishada Daruuriga ah.

Dadkani ayaa gubayay taayeero, isla markaana waxaa ay dhagxaan la dhacayeen Goobaha Ganacsiga iyo Gaadiidka Bl-ka ah ee isaga kala gooshaya qeeybaha kala duwan ee Gobolka Banaadir.

Guud ahaan isku socodka Dadka,Gaadidka iyo Ganacsiga ayaa maalintii labaad waxaa saameeyn ku yeeshay dibadbaxyadani rabshadaha wata ee ay dhigayaan dad ka careeysan diidista kunka Shilin ee Somaliga ah.

Maanta waxaa gebe ahaanba istaagey Ganacsigii iyo isku socodkii gaadiidka iyo daweyanha Magaalada Muqdisho marka laga reebo Gaadiidka Ciidamada Dowladda.

Dhanka kale waxaa soconaya kulan looga hadlay Arimahan saameeyay dadka Shacabka ah ee sare u kaca Maciishada qutul daruuriga ah iyo kala sooca lagu ahayo Shilin Soomaaliga, kaasi oo ay leeyihiin Gudiga Ganacsatada Gobolka Banaadir iyo kuwa Suuqa Bakaaraha.