Mogdishu,(insidesomalia.org) Golaha Dhaqanka iyo Midnimada Beelaha Hawiye ayaa dowladda KMG Soomaaliya ku eedeeyay in ay dadka Soomaaliyeed u diidan tahay in ay soo gutaan Waajibaadka Xajka Sanadkan.

Warsaxaafadeed uu soo saaray Golahaasi ayaa lagu sheegay in dad badan oo Soomaaliyeed ay iska dhaafeen in ay sanadkan soo xajiyaan kadib markii ay dowladdu soo saartay sida lagu yiri warsaxaafadeedka Baasaboor ay shirkado ajnabi ah gacanta ku hayaan oo aan kalsooni ka heysan Shacabka Soomaaliyeed, isla markaana aan aqoonsi ka heysan Beesha Caalamka.

Dowladda KMG Soomaaliya ayay ugu baaqeen Odayaasha Hawiye in ay ogolaato in lagu soo xajiyo Baasaboorkii hore ee Soomaaliya, bacdamaa Baasaboorka cusub uu yahay mid aanay dadka wada heysan, isla markaana uusan jirin Dal weli lagu tegay ama aqoonsi siiyey.

"Goluhu waxa uu soo jeedinayaa in dowladda KMG ay joojiso qorshaha qasabka iyo degdegta ah ee ay ku hirgelineyso Baasaboorka ay soo samaysatay, ayna u ogolaato Dadka Soomaaliyeed ee Muslimiinta ah in ay soo gutaan waajibaadka Xajka oo ka mid ah Shanta tiir ee Islaamka" ayaa lagu yiri Warsaxaafadeedka ka soo baxay Golaha Dhaqanka iyo Midnimada Beelaha Hawiye oo uu ku saxiixnaa Guddoomiyaha Golahaas Maxamed Xasan Xaad.

Sidoo kale Golaha Dhaqanka iyo Midnimada Beelaha Hawiye waxa uu ka digay in is-hortaagga ay Dowladda KMG ku sameysay in lagu soo Xajiyo Baasaboorkii hore ee Soomaaliya uu ka Dhasho kacdoon shacbi, qalalaase iyo nabadgelyodarro uga sii darta xaaladda uu haatan ku sugan yahay dalka Soomaaliya.

Hadalka maanta ka soo baxay Odayaasha ku bahoobay Golaha Dhaqanka iyo Midnimada Beelaha Hawiye ayaa wuxuu ku soo beegmayaa iyadoo dhawaan ay shaacisay Waaxda Socdaalka dowladda KMG Soomaaliya in aan Xajka lagu aadi karin Baasaboorkii hore ee Soomaaliya, isla markaana ay qasab tahay in ay Xujeydu qaataan Baasaboorka cusub ee ay soo sameysay dowladda KMG Soomaaliya.

Comments (0)

Subscribe to this comment's feed

Write comment

Name

Email

Title

Comment

smaller | bigger

Subscribe via email (Registered users only)

I have read and agree to the Terms of Usage.

Add Comment