Muqdisho, (insidesomalia.org)- Madaxa Isbitaalka Madiina ee Muqdisho oo maanta saxaafada kula hadlay isbitaalkaas ayaa sheegay in dhaawacyada isbitaalka yaala ay ka badan yihiin intii loogu talogalay inuu Isbitaalku qaabilo.

Dr. Maxamed Yuusuf oo saxaafada la hadlay ayaa sheegay in 136-bukaan ay iminka jiifaan Isbitaalka Madiina, kuwaasoo ku dhaawacmay dagaalo iyo qaraxyo ka dhacay Muqdisho maalmihii ugu dambeeyay.

"Isbitaalka waxaa loogu talogalay inuu qaabilo 65-qof oo qura, balse waxaa haatan yaalaa in ka badan laba laab, culeys ayayna arrintaas ku haysaa Isbitaalka" ayuu yiri maamulka Isbitaalka Madiina.

Isbitaalka Madiina ayaa ayaa waxaa la gaarsiiyay tiro dhaawacyo ah 24-kii saac ee ugu dambeeyay, kuwaasoo ka dhashay dagaaladii ugu dambeeyay ee ka dhacay hareeraha suuqa weyn ee Bakaaraha iyo Madaxtooyada.

"Dhaawacyadii nala soo gaarsiiyay waxaa ugu daran saddex qof oo dhaawacyo halis ah ay ka gaareen madaxa, kuwaasoo ku jiray (Qolka soo kicinta) mid ka mid ah ayaana dhintay" ayuu yiri Dr. Maxamed Yuusuf.

Madaxa Isbitaalku wuxuu sheegay in dawooyin ku filan ay haystaan, balse ay dhici karto in dawooyinka ay ka go'aan haddii ay sii socdaan dhaawacyada lasoo gaarsiinayo.